ماريلاندز

منطقة في غرب سيدني بنيت فيها مسكني

ـ1ـ

ماريلاندز.. الْـ عايشْ فيها

مِنْ شَمْعِةْ عُمْري عاطيها

النّور الْـ عَمْ يِضْوي لْياليها

ـ2ـ

جيتْ عْلَيْها شَبّ زْغيرْ

ضِحْكاتُو مِتْل عْصافير

فَوْق شْوارِعْها بِتْطيرْ

ـ3ـ

بَيْتي عِمَّرْتُو تا صارْ

لِلْكلمِه، للشِّعرْ مْزارْ

وْكيفْ جَمَّعْ مَجْدُو.. بْتِحْتارْ؟

ـ4ـ

خَمْسين سِنِه فيها عِشتْ

حَضْنِتْني وْإيدَيْها فْرَشْتْ

وْمِن شَجْرِة حُبَّا حوَّشْتْ

ـ5ـ

أللـه فيها مْحَبَّبْني

وْنَبْرِة صَوتا بْتِعْجِبْني

بِتْناديني: يا إِبْني

ـ6ـ

ماريلاندز.. بْعِدّا أُمّي

مْحَبِّتْها عَمْ تِجْري بْدَمّي

صارِتْ غِنّيِّه معروفه

قطَّبتْ حْروفا عَ تِمِّي

**