نشرت قصائد أعراس إخوتي الخمسة في هذه المجموعة لأنها تأتي على ذكر مدن أسترالية عاشوا فيها، كما أنها تسجل خطواتي الأولى على طريق الاغتراب
**
جورج وآن
يوم وصلني الى لبنان خبر زواج أخي جورج من ابنة خالتنا آن البحري في مدينة سيدني 1969
ـ1ـ
"جورج" خَيِّي حَبّ.. صار الْحُبّ
يكْتُب إِسِمْ مَحْبُوبْتُو بالزَّهْرْ
"آن بَحْرِي" إِسِمْها.. يا رَبّْ
خَلِّي حَيَاتُنْ شَمْس طُول الْعُمْر
"جُورج" خَيِّي شَبّ.. أَحْلَى شَبّْ
و"آن".. وَرْدِه مْشَنِشْله بِالْعطْرْ
صَفَّى عَ ضِحْكِتْها يْدِقّْ الْقَلْبْ
وْصَارِتْ حَيَاتُو كلّها بِالْهَجْرْ
ـ2ـ
يا رَبّ بَارِكْهُنْ بِـ "سيدْنِي" كْتِيرْ
وْزيّن الطّرقات بزْهور وْحَرير
"آن" حبّت "جورج البعيْني" الأمير
فارس بطل ما بتشبهو الفرسان
حْميهُن سوا عَ طول يا ديّان
كِرْمالْ عَيْنُنْ بَسّ هَالعِرْسَانْ
كْفِرْصغَاب رَقْصِتْ بِـ جَبَل لُبْنانْ
وْمِجِدْلَيَّا زَلْغَطِتْ قِصْدانْ
وْودّت هديه.. قَلِبْهَا الِكْبِيرْ
**
مرسال ولور
يوم وصلني من لبنان خبر زواج اخي الأصغر مرسال بعيني من ابنة رشدبين الحبيبة لور ديب 1976
زْغِير البيت مغروم بصبيّه
إسما "لور".. خلقتها رضيه
رِشْدبين ربّتها عَ دَيْها
تا فاحْ العطر من وَرْده جورِيه
وخيي كْتير كان خايف عَلَيْها
فَتَحلا القلب متل المزهريّه
وقطفها من كرم إمّا وْبَيْها
وْقلُّن: "لور" رح بِتْصير لِيي
ونقّى خْواتم تزيّن إيديْها
حُبّن كان من ألله هْدِيه
حِلف "مرسال" ما يْزَعّل عينَيْها
وْحطّ الايد عَ جلدة شْبيّه
وأنا من هون مِنْ "سيدني" بْدينَيْها
بَدّي قُول: فرحتنا كْبيره
رغم العيش بـ أبعد جزيره
سْكنتي القلب.. يا "لورْ" الوفيّه
**
جوزاف وفيرونيكا
يوم وصلني من لبنان خبر زواج أخي جوزاف بعيني من ابنة سيدني فيرونيكا البحري 3/9/1972
ـ1ـ
"جوزاف" خَيي عَمْ يتزوَّجْ
"مارْ يوسف" فرحان كْتير
بْضيعتنا في دير مسيّجْ
بْقلبو الْفَرْحه عم بِتْصير
ـ2ـ
"فرونيكا البحري" يا ناس
بْتِشْهَدْلا "سيدني" كلاّ
لمّن وقفِتْ بالقداس
باركها بْإيدو ألله
"سركيس" بَيّي عَلاّ الراس
وْقللاّ لإمي بْعرس الحب
زَلغطي يا "بَتْرونلّه"
ـ3ـ
"جُوزاف" خيي رْفيق الدَّرْب
مِنْ يوم اللي كنّا زْغار
تا يِتْهنّا.. سْألت الربّ
والفرحَه بْقلبي قنْطار
تْمنيت حَدّو أوقف شَبّ
وْنِتْرافق هُوّي وخِتْيار
عريس كْتير بْيِنْحَب
يا ضَيْعِتْنا دقّي طْبول
ويا "سيدني" رشّي الأزهارْ
**
أنطوان وتريز
يوم وصلني الى لبنان خبر زواج أخي الاكبر أنطوان بعيني في مدينة ملبورن الأسترالية على جارتنا تريز أنيسة 1967
أنا بْ "لبنان".. يا "ملبورن" قوليلو
صعبه الْخَي ننسالو جْميلو
"إبن سركيس" يا فرحة شَبابو
بعتم الْهجر عم تِضْوي قْناديلو
كْبير البيت.. رح تُوقف عَ بابو
شَمْس الكون، تا تشع مْقابيلو
"تريز" بْجيرتو رفْعِت عْتابو
وْبِضحكة سنّها بْتِطْفي غليلو
حَبّا كتير.. تا الأيام شابوا
وْهديها قلبْ ما بْيِخْلق مثيلو
أخي "أنْطون" عَمْ يكتب كْتابو
عَ بِنْت الْجار.. يا شعري حْكيلو:
أحلى تْنَيْن مِنْ يوم اللي غابوا
دَمْع الأرز ما بْيوقَفْ عَويلو
**
ميشال وتراز
يوم وصلني من من لبنان خبر زواج أخي ميشال من ابنة عمتي تراز اليموني في جزيرة قبرص 1976
يا "قبرص" ليش دَمْعاتي سَخيّه
وليش القلب دقّاتو قَويه
بِأرضِك.. زيّني السّاحات عنّي
يا جارَه.. وْبَوّسي "ميشال" خيي
كمان بْحَلّفك "تَرّوز" هَنّي
وْمن الأزهار نَقّيلُن هْدِيّه
وْخَلّي الطّير بـ عرسُن يغنّي
بيّا "جورج" والعَمّه الهَنيّه
فرحانينْ.. يا أفراح جنّي
بِفَرحةْ بنت مَحبوبه ورَضيه
وبيي قال للكنه : تْمَنّي
مَرْت الخال بِتْغطّي عْليي
يا "بَتْرونلّه" عَ الشّمس حِنّي
من أرض "برسا" بْتِنْسَمى هيي
ويا بنت "مالبورن" مُش رَح بْتَنّي
إنتي و"ميشو" بْقلبنا سْويه
وهَالْـ كم كلمه بْتِسْمعي مِنّي:
مُشْ رح تكوني بنْت أختي بَسّ
بِنْتي أنا.. وْمَبروك يا كنّه
**
