آلة موسيقيّة ابتكرها الشّعب الأبوردجيني، شعب أستراليا الأصلي
ـ1ـ
شُو هَـ الصَّوْت الْـ عَمْ يِسْحِرْني
الْهَيْصَه وِالْفَرْحَه بْتِرْديدو؟
والشَّعْب الأَصْلِي الْـ غَامِرْني
بْحُبّو.. عَمْ بِيرَقِّصْ عِيدو
الْـ بَدُّو بالنَّغْمِه يْصَبِّرْنِي
يْسَمِّعْنِي ( الدِّيدْجِيرِيدُو)
ـ2ـ
الأَبُورِدْجِيني.. صَيَّرْهَا
قَصْبِه.. بِتْرَكِّعْ أَنْفَاسْ
دَوَّرْهَا مْنِيحْ.. وْعَطَّرْهَا
أَطْوَلْ مِنّو.. لَوْ تِنْقَاسْ!!
بْيِنْفُخْ فِيها.. بِـ طَيَّرْهَا
نَغْمِه.. بْتِسْحُرْ كِلّ النَّاسْ
ـ3ـ
كْلِيكْ ـ سْتِيكْسْ: الْغَبْرَه طارِتْ
مِنْ تَحْتِ الإِجْرَيْنْ السّمرْ
السّاحَه جَنِّتْ.. شِعْلِتْ.. صَارْتْ
تِهْدِيِنَا مْنِ الْغَبْرَه غُمْرْ
لِمِّنْ دَارُوا.. السَّهرَه دَارِتْ
وْصَفَّى فِينَا يْدُورْ الْعُمرْ
**
